काठमाडौंः सरकारले पाँच कम्पनीको नामै किटेर उनीहरुबाट उत्पादित स्यानिटाइजर नकिन्न नागरिकलाई आग्रह गरेको छ ।
शनिबार एक सूचना निकाल्दै औषधी व्यवस्था विभागले प्रयोगशालामा परीक्षण गर्दा मापदण्ड विपरित विषाक्त रसायन मेथानल प्रयोग भएको पाइएको भन्दै ती स्यानिटाइजर प्रयोग नगर्न अनुरोध गरेको छ ।
विभागले निकालेको सूचनामा भक्तपुरको नेपाल कायाकल्प उद्योग भक्तपुरसहित काठमाडौंका हाईजिन सोप एण्ड केमिकल्स, आधार केमिकल एण्ड फुड इन्डष्ट्रीज, सर्च केम कम हर्बल प्रडक्ट्स र सूर्यमुखी हर्बल प्रडक्टका उत्पादन प्रयोग गर्न नहुने उल्लेख छ ।
यस्ता स्यानिटाइजरले मानव स्वास्थ्यमा गम्भीर असर पार्ने भन्दै विभागले ती उत्पादनको बिक्री वितरण रोक्न सरोकारवाला निकायलाई अनुरोध गरेको छ । यी उद्योगमाथि कारवाही प्रक्रिया अघि बढाइएको पनि विभागले जनाएको छ ।
