दमौलीः व्यास नगरपालिकाले एक अर्ब ७७ करोडको बजेट ल्याएको छ । दमौलीस्थित नगरपालिकाको सभाहलमा ३५ औं नगर सभामा नगर उप प्रमुख मीरा जोशीले बजेट प्रस्तुत गरेकी छन् ।
नीति तथा कार्यक्रम पारित भए पछि नगरपालिकाले बजेट ल्याएको हो ।
बजेटमा कोरोना भाइरसका कारणले राजश्व संकलन, अनुदान प्राप्त अवस्था सन्तोषजनक नभएकोले विकास आयोजनाहरुमा गति लिन नसक्दा यसवर्ष सम्झौता भइसकेका तर सम्पन्न हुन नसकेका नगरवासीको भावना र सरोकारसँग जोडिएका योजना भन्दै अधुरा योजनाहरु र निरन्तर क्रमागत योजनाहरुमा रु.१० करोड विनियोजन गरिएको छ ।
बजेटले दुग्ध सहकारी मार्फत बिक्री हुने दुधमा प्रतिलिटर रु.१। र सहकारी मार्फत बिक्री हुने खसीबोकामा प्रति किलो रु.१०। सम्बन्धित किसानलाई अनुदान दिने कार्यक्रमलाई निरन्तरता दिएको दिएको छ ।
यसबाहेक बजेटले पूर्वाधार विकासलाई प्राथमिकता दिएको छ । कृषि र किसानसँग सम्बन्धित अनुदान कार्यक्रममा नगरपालिकाको बजेट पर्याप्त विनियोजन गरिएको नगरपालिकाले दाबी गरेको छ ।
यसैगरी प्राथमिकता दिएका भनिएका योजनाहरुमा पनि नगरपालिकाले प्रशस्त बजेट विनियोजन गरेको छ ।
बजेटको तनहुँ टेलिभिजनले प्रत्यक्ष प्रशारण गरेको थियो ।