दमौलीः तनहुँ प्रशासनले तनहुँमा कोरोना जोखिम बढेको भन्दै वैशाख महिनाभर सिनेमा हल, पार्टी प्यालेस, दोहोरी घर, जिमखानासहितका भिडभाड हुने ठाउँका गतिविधि रोक्ने निर्देशन दिएको छ ।
प्रशासनले जारी गरेको सूचनामा यस अवधिमा मठ मन्दिर, चर्च, गुम्बा तथा मस्जिदलगायतका धार्मिक स्थलमा समेत जमघट नगरीकन पूजा, ध्यान र प्रार्थना गराउन भनिएको छ ।
तालिम र सभा समारोह सञ्चालन गर्दा २५ जनाभन्दा बढी नराख्न तथा सबै कार्यक्रममा स्वास्थ्य मापदण्ड पालना गर्न समेत आग्रह गरिएको सूचनामा सहायक प्रमुख जिल्ला अधिकारी चित्रांगद बरालले हस्ताक्षर गरेर जारी गरिएको छ ।
प्रशासनले होटल तथा रेष्टुरेन्ट राती आठ देखि विहान आठ बजेसम्म बन्द गर्न पनि भनेको छ ।
