दमौलीः अविरल वर्षा र सम्भावित विपद्को जोखिमलाई मध्यनजर गर्दै रातको समयमा पृथ्वी राजमार्ग बन्द गर्ने निर्णय गरिएको छ । जिल्ला प्रशासन कार्यालय धादिङले बिहीबार रातको समयमा पृथ्वी राजमार्गमा सवारी आवागमन पूर्ण रूपमा रोक लगाउने निर्णय गरेको हो ।
बिहीबार राति ८ बजेदेखि शुक्रबार बिहान ५ बजेसम्मका पृथ्वी राजमार्ग भएर चल्ने सम्पूर्ण सवारी साधनको आवागमन बन्द गर्ने निर्णय गरिएको जिल्ला प्रशासन कार्यालय धादिङले जनाएको छ ।
यसैगरी, जोखिमलाई ध्यानमा राख्दै मुग्लिङ नारायणगढ सडक खण्डमा समेत राती यातायात सञ्चालनमा रोक लगाइएको छ ।
अहिले देशैभर अधिक वर्षा भएका कारण देशैभरका प्रमुख राजमार्गहरुमा रातभर सजगता अपनाउँदै यातायात आगमनमा रोक लगाइएको गृह मन्त्रालयले जनाएको छ ।
