दमौलीः कोरोना संकट देशैभर गहिरिंदै जाँदा तनहुँमा सम्भव भएसम्म भर्चुअल कक्षा सञ्चालन गर्न जिल्ला संकट व्यवस्थापन समिति(डिसीएमसी)ले निर्णय गरेको छ ।
आईतबार जिल्ला प्रशासन कार्यालयमा प्रमुख जिल्ला अधिकारी सागर आचार्यको संयोजकत्वमा बसेको स्थानीय तहका जनप्रतिनिधि र सरकारी अधिकारीसमेत सहभागी बैठकले शिक्षण संस्थामा भर्चुअल विधि प्रयोग सम्भव नभएमा एउटा कक्षामा २५ जनासम्म मात्र राखेर तथा स्वास्थ्य मापदण्ड पालना गरेर पठनपाठन सञ्चालन गर्ने निर्णय गरेको हो ।
बैठकले नजिकिंदै गरेका परीक्षाहरु दुरीसहित स्वास्थ्य मापदण्ड पालना गरेर दुई सिफ्टमा गर्ने पनि निर्णय गरेको छ ।
यसअघि जिल्ला शिक्षा विकास तथा समन्वय एकाईको बैठकले स्वास्थ्य मापदण्ड पालना गरेर उच्च सतर्कताका साथ स्थानीय तहहरुमा पठनपाठन अघि बढाउने निर्णय गरेको थियो ।