तनहुँ उद्योग वाणिज्य संघको अध्यक्षमा निर्वाचित भए पछि श्रेष्ठले भने,‘आज हामी सबैको जीत भएको छ’ (भिडियोसहित)

दमौलीः तनहुँ उद्योग वाणिज्य संघका अध्यक्ष पबिन्द्रकुमार श्रेष्ठले सबैको भावना समेटेर अघि बढ्ने प्रतिवद्धता जनाएका छन् । निर्वाचित भएलगत्तै परिणाम सार्वजनिक गर्न आयोजित सभामा बोल्दै उनले भने,‘आजको जीत हामी सबैको जीत भएको छ । कसैको पनि हार भएको छैन । म सबैको भावना समेटेर अघि बढ्नेछु ।’

१४ औं महाधिवेशनमा आफू सफल हुन नसके पनि यसपाली आफूलाई अगाध स्नेह र मायाका साथ जिताएको भन्दै मतदाताप्रति खुशी प्रकट गरेका उनले भने,‘म यहाँहरुको अमूल्य मतको ऋणी भएको छु । अबका संघका गतिविधि सबै व्यवसायीको आत्मसम्मान उच्चो बनाउन लाग्नेछु ।’

अग्रज धरोहरको प्रेरणाले अघि बढ्नेछु
श्रेष्ठले आफ्नो विजय मन्तव्यका क्रममा पूर्व अध्यक्षसहित अग्रजप्रति आभार प्रकट गरे । ‘अग्रजहरुको प्रेरणा र सद्भावले २०५८ सालदेखि निरन्तर संघका विभिन्न महत्वपूर्ण पदमा रहेर सेवा गर्ने अवसर पाएको थिएँ,’ उनले भने,‘अग्रज र धरोहरहरुप्रति आभार प्रकट गर्दछु ।’

श्रेष्ठले सबै व्यवसायीको भावना समेटेर अघि बढ्ने प्रतिवद्धता जनाए । संघका अध्यक्ष मानकाजी श्रेष्ठले निर्वाचित सबै पदाधिकारीलाई बधाई ज्ञापन गरे । कार्यक्रममा निर्वाचन समितिका सदस्य शिवदत्त ढकालले निर्वाचनको परिणाम घोषणा गरेका थिए ।