एक लाख ३५ हजार पुरस्कार राशीको ऋषिङ कप भलिबलमा छिमेकका जिल्ला पनि सहभागी हुने

दमौलीः ठूलो पुरस्कार राशीका साथ ऋषिङ गाउँपालिकाले आयोजना गरेको प्रथम ऋषिङ अध्यक्ष कप अन्तरपालिका भलिबल प्रतियोगिताको तयारी तीव्र पारिएको छ ।

गाउँपालिकाले एक लाख ३५ हजार नगद पुरस्कार राखेको प्रतियोगिता ऋषिङ ४ थप्रेकस्थित महेन्द्रज्योति प्राविको खेलमैदानमा गर्दैछ । दोश्रो पुरस्कार ८० हजार र तेश्रोलाई ५० हजार राखिएकोमा गाउँपालिकाले व्यापक सहभागीता बढाउने अपेक्षा गरेको छ ।

फागुन १५ गते शनिबार शुरु हुने प्रतियोगिताका लागि तनहुँ तथा आसपासका तहबाट समेत स्थानीय तहको उपस्थिती बाक्लो पार्ने योजना गाउँपालिकाको छ । यसका लागि आवश्यक सबै तयारी भैरहेको गाउँपालिका अध्यक्ष राजेन्द्रकृष्ण श्रेष्ठले बताए । ऋषिङ क्षेत्रमा भलिबल खेल अत्यधिक लोकप्रिय छ ।

तनहुँ जिल्लामा हुने विगतका प्रतियोगिताहरुमा त्यस क्षेत्रका खेलाडिले उत्कृष्ट प्रदर्शन समेत गर्ने गरेका थिए । गाउँपालिकाले आफ्नो खेलको पहिचान र प्रवद्र्धनका लागि प्रतियोगिता आयोजना गरेको हो ।

प्रतियोगितामा बाक्लो टिम सहभागीताका लागि प्रयास भैरहेको प्रचार समितिका सदस्य सचिव दानबहादुर श्रेष्ठले बताए । शनिबार शुरु हुने प्रतियोगिताका लागि शुक्रबार साँझसम्म टिम दर्ताको अवधि राखिएको छ ।