पवन पौडेल
दमौलीः फागुन ४ गतेबाट मुख्यमन्त्री कप भलिबल प्रतियोगिता शुरु हुँदै थियो । भलिबलमा उसै पनि धेरै खेलाडि भएको तनहुँसामु बलियो टिम पठाउनुपर्ने चुनौती पनि थियो । तर खेलाडि पठाउन पत्र पाएका भलिबल संघका पदाधिकारीले उनीहरुलाई पठाउने खर्च भने पाएनन् ।
महिला र पुरुष गरी दुवैतर्फको स्पर्धामा सहभागीता जनाउनु त थियो नै उपाधि पनि आफ्नो हातमा ल्याउने चुनौती संघसामु थियो । तर हातमा थियो, शुन्य रुपैयाँ ।
खेल्नुअघि खर्च जुटाउने दौडधुप
करिब पाँच दिनको बसाईमा रहने दुई टिमका झण्डै 28 जनाको टिमको खर्च सरकारी निकायबाट नआए पछि आफ्नै बलबुतामा जुटाउनु पर्ने दायित्व भलिबल संघ तनहुँले छाडेन । खेलमा टिम पठाउनु केही दिन अघिसम्म पनि सहयोगको पत्र लिंदै संघ संस्था अनि सुभेच्छुक चहार्दै हिंडेका पदाधिकारीले हिम्मत हारेनन् । अनि शुरु भयो, पोखरा यात्रा ।
पुरुषतर्फको फाईनलमा बलियो टिम स्याङजामाथि जित पाउन सहज थिएन । तर उच्च मनोबल र व्यवस्थापनका कारण खेलाडिले कठिन नै सहि जित हात पारे ।
बेस्ट अफ फाईभमा सञ्चालित प्रतियोगितामा ३–२ को सेटले स्याङजाको टिममाथि तनहुँले जित प्राप्त गरेको थियो ।
कठिन परिश्रम अनि सफलताको स्वाद
उता, अर्को बलियो टिम कास्कीमाथि सेमीफाईनलमा जित दर्ता गरेर महिला टिमले पनि आफ्नो क्षमता प्रदर्शन गर्यो । यसले अन्तिम समयमा भलिबल संघ तनहुँले गरेको दौडधुपलाई सफल पारिदियो । खेलाडिलाई प्रतियोगितामा सहभागी बनाउन अध्यक्ष पदम सुनार र सचिव अशोक गिरीसहितका पदाधिकारीले कम्ता पापड भने बेल्नु परेको थिएन । तर काढ्न हुने कठिनाई भए पनि निस्केको महको स्वाद स्वादिलो हुन्छ, सायद टिमले त्यही चाख्न पायो ।
सुनार भन्छन्,‘हाम्रो अभियानमा देश मात्र नभएर विदेशबाट पनि सघाउने निस्कनुभयो । यो जितमा सबैको भागेदारी छ । हामीले हाम्रो क्षमता प्रदर्शन गरेका छौं ।’
सचिव गिरी पनि शुरुवाती रुपमा खर्च जुटाउन कठिन भए पनि दुवै खेलमा प्राप्त जितले थप राम्रो गर्न हौसला मिलेको बताए ।
‘राष्ट्रियस्तरसम्म पहिचान बनाएका खेलाडिलाई आर्थिक अभावमा खेल्न नपठाउने भन्ने सम्भव थिएन,’ उनले भने,‘उनीहरुको प्रतिभा मर्न नदिन गरेको प्रयास सफल हुँदा हामी मात्र होइन सबै खुशी छौं ।’
