भदौ १७, आँबुखैरेनी
आँबुखैरेनी ४ ऐनापहरोमा सवारी खसेको आशंकाले खोज्न गएको सशस्त्र प्रहरीको टोली फर्किएको छ । पानीको बहाव उच्च रहेको र केही खोजी गरे पनि उपलब्धि हासिल नभएकाले टोली फिर्ता भएको आँबुखैरेनी प्रहरीले जनाएको छ । ‘पानीको बहाव धेरै भएकाले सोचेजस्तो खोजी हुन सकेन,’ ईलाका प्रहरी कार्यालय आँबुखैरेनीका इन्स्पेक्टर विकास थापाले भने,‘खोजविनमा समस्या भए पछि टोली फर्किएको छ ।’
मस्र्याङदी नदीको बहाव उच्च भएको र निकै गहिरो भएकाले पनि खोजविनमा समस्या देखिएको बताइन्छ । ‘गोताखोरले प्रयास गरे पनि नसक्ने अवस्था आएको देखियो,’ स्थानीय बादल थकालीले भने ।
बुधबार विहान पृथ्वी राजमार्गको सडक क्षेत्रमा पेटी भत्किएको देखिए पछि सवारी खसेको आशंका गरेर खोजविन थालिएको थियो । पोखराबाट मुग्लिनतर्फ जाँदै गरेको सवारी खसेको हुनसक्ने आशंकाका बीच खोजी थालिएको थियो ।
अब प्राविधिक खोजी गछौंः प्रहरी
प्रहरी निरिक्षक विकास थापाले के खसेको र कसरी खसेको वा नखसेको यकिन नभएकाले अब प्राविधिक हिसाबले खोजी गरिने बताए । ‘हामीले राजमार्गको सीसीटीभी फुटेज हेरेका छौं,’ उनले भने,‘एउटा ट्रकका चालक सम्पर्कमा नभएको सुनिएकाले पहिला सोही ट्रक हो कि होइन यकिन गरेर थप खोजी अघि बढाउँछौं ।’