दुलेगौंडा: तनहुँको शुक्लागण्डकी–५ बेलचौतारामा जारी चौथो शुक्लागण्डकी महोत्सवमा आज चर्चित लोकदोहोरी गायिका शान्तिरानी परियारले दर्शक नचाउने भएकी छिन् । उनले चर्चित गीत ‘म त ढले ढले’ गीत प्रस्तुत गर्नेछिन् । विगत लामो समयदेखि गायन क्षेत्रमा रहेपनि उनलाई यसै गीतले चर्चामा ल्याएको हो । गीत चर्चित भएपछि मेला महोत्सवमा परियारलाई भ्याई नभ्याई हुने गरेको छ ।
यसैगरी आजै गायिका नविना सुवेदी, गायक कृष्ण सुवेदी, गगन गुरुङ लगायतको प्रस्तुती समावेश गरिएको कलाकार व्यवस्थापन समितिका संयोजक सुमन सापकोटाले जानकारी दिए । साथै आज राती टुकी ब्याण्डको लाईभ कन्सर्ट हुने कन्सर्ट व्यवस्थापन समितिका संयोजक प्रकाश थापाले बताए ।
शुक्लागण्डकी नगर उद्योग वाणिज्य संघको ओजनामा फागुन २० गतेसम्म सञ्चालन हुने महोत्सवमा घरेलु, कृषि, व्यवसायिक, रेष्टुरेन्ट, सामाजिक संस्था लगायत कुल १ सय ७५ स्टल समावेश गरिएको छ । राष्ट्रिय तथा स्थानिय ख्यातिप्राप्त कलाकारहरुको प्रस्तुती, लाईभ कन्सर्ट, बाल उद्यान, धार्मिक, सांस्कृतिक र ऐतिहासिक स्थलको पदयात्रा, खानाका परिकार, पुष्प प्रदर्शनी तथा विक्रि, दैनिक उपभोग्य बस्तुको प्रदर्शनी एव बिक्री, हस्तकलाका सामान विक्रि तथा प्रदर्शनीलाई समावेश गरिएकोे संघका महासचिव एवम् प्रवक्ता सुजन श्रेष्ठले जानकारी दिए ।
महोत्सवमा पालिकास्तरीय भलिबल प्रतियोगिता, रत्यौली प्रतियोगिता, कौरा नृत्य, विद्यालयस्तरीय खुला नृत्य प्रतियोगिता समेत समावेश गरिएको मुल संयोजक समुन्द्रराम श्रेष्ठले बताए ।
सम्पूर्ण वडा व्यवस्थापन समिति र महिला उद्यमी विकास समितिको सह–आयोजना र नेपाल उद्योग वाणिज्य महासंघ गण्डकी, नेपाल उद्योग वाणिज्य महासंघ र नेपाल पर्यटन वोर्डको प्रवद्धनमा महोत्सव भएको हो । महोत्सव अवधिभर २ लाख दर्शकको सहभागिता र करिव ५ करोड रुपैयाको आर्थिक कारोवार हुने अनुमान छ ।
