पाल्पा : डेरामा बस्ने व्यक्तिको हत्या आरोपमा एक जनालाई पाल्पा प्रहरीले पक्राउ गरेको छ ।
पक्राउ पर्नेमा तानसेन–११, साँचाका ३१ वर्षीय माधव विष्ट रहेको जिल्ला प्रहरी कार्यालय पाल्पाले जनाएको छ ।
विष्टको घरमा डेरामा बस्दै आएका रिव्दीकोट–१, जोगीथुमका ५२ वर्षीय रुद्रबहादुर बुढाथोकीको हत्यामा संलग्न रहेको आरोपमा प्रहरीले विष्टलाई पक्राउ गरेको हो । बुढाथोकी केही समयअघिदेखि विष्टको घरमा डेरा लिएर बस्दै आएका थिए ।
बुढाथोकीले मजदुरीको काम गर्दै आएका थिए । प्रहरीकाअनुसार बुढाथोकी माघ २३ गते बुधबार बिहान ८ बजेतिर डेराको कोठामा मृत भेटिएका हुन् ।
मृत भेटिए पनि बुढाथोकीको नाक, निधार, मुख र सुतेको खाटमा समेत रगत लागेकाले थप अनुसन्धान गर्दा घरबेटीले नै हत्या गरेको खुलेको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिए ।
बुढाथोकीको शव लुम्बिनी प्रादेशिक अस्पताल बुटवलमा पोस्टमार्टम गराई परिवारलाई बुझाइएको छ । विष्टलाई बिहीबार पाल्पा जिल्ला अदालतबाट म्याद थप गरी घटनाबारे थप अनुसन्धान भइरहेको प्रहरीले जनाएको छ ।
