तनहुँ: तनहुँको आँबुखैरेनी गाउँपालिका र चितवनको चितवन मेडिकल कलेज बीच स्वास्थ्य सम्झौँता भएको छ । मंगलबार आँबुखैरेनी गाउँपालिकाका अध्यक्ष शुक्र चुमान र चितवन मेडिकल कलेजका निर्देशक प्रताप देवकोटा बीच उक्त सम्झौँता भएको हो ।
सम्झौँता अनुसार चितवन मेडिकल कलेजबाट उपलब्ध गराउने उपचार सेवाहरुमा पालिकाका नागरिकहरुले २० प्रतिशत रकम छुट पाउने भएका छन् । यस्तै, अस्पतालले प्रत्येक १५/१५ दिनमा विशेषज्ञ सेवा उपलब्ध गराउने सम्झौँता समेत भएको पालिकाले जनाएको छ ।
पालिकाको विकट क्षेत्रलाई केन्द्रित गरी निःशुल्क विशेषज्ञ सेवा सहितको स्वास्थ्य शिविर सञ्चालन गर्नका लागि आवश्यक जनशक्ति र उपकरण मेडिकल कलेजले उपलब्ध गराउने सम्झौँता भएको हो । सम्झौँतामार्फत पालिकाका नागरिकहरूलाई स्वास्थ्य सेवा लिन थप सहज हुने बिश्वास पालिकाले लिएको छ ।
