दमौलीः उतारचढावपूर्ण चुनावी ग्राफलाई स्थिरता दिंदै व्यास नगरपालिकाको प्रमुखमा कांग्रेसका बैकुण्ठ न्यौपाने दोहोरिएका छन् ।
आफ्ना प्रमुख प्रतिष्पर्धी कांग्रेस पूर्व सहमहामन्त्री गोविन्दराज जोशीका पुत्र दीपकराजमाथि कठिन जित दर्ता गरेका न्यौपानेले कुल खसेको मध्ये ३० हजार दुई सय ४७ मध्ये १२०८७ मत पाए ।
एमालेको समर्थन पाएका दीपकराजले ११८२६ पाए । उनका पक्षमा करिब एक हजार मत भने बदर हुन पुग्यो ।
दुईबीचको मतान्तर दुई सय ५२ रह्यो ।
यससँगै लामो समयदेखि राजनीतिक मैदानमा रहेका न्यौपानेले आफ्ना नेता रामचन्द्र पौडेलका चिर प्रतिस्पर्धी गोविन्दराज जोशीलाई उनका छोरा हराएर जितको सन्देश दिएका छन् । तर उनको खस्किएको मतले भने आगामी दिनमा आफ्नो लोकप्रियता बढाउन थप मेहनत गर्नुपर्ने सन्देश दिएको छ ।
उपप्रमुखमा विजयी कांग्रेसकी इन्दिराले १३,४९८ मत पाउँदा उनकी मुख्य प्रतिष्पर्धी एमालेकी बसुन्धरा घर्तीले १०,०४२ मत पाइन् ।