दमौलीः व्यास नगरपालिकाले शैक्षिक बेरोजगार महिलालाई अनुदान दिनका लागि कार्यविधि तयार गरेको छ । यस अघि नै पारित कार्यक्रमका लागि आइतबार बसेको नगर कार्यपालिका बैठकले यस्तो कार्यविधि पारित गरेको नगरपालिकाका प्रमुख प्रशासकिय अधिकृत डिल्लीराम सिग्देलले जानकारी दिए ।
बैठकले वैदेशिक रोजगारबाट फिर्ता हुनेहरुलाई वितरण गरिने अनुदान सम्बन्धी कार्यविधि पनि तयार पारेको छ । यसैगरी, कर्मचारी सेवा सुविधा मापदण्ड, पुरस्कृत गर्ने सम्बन्धी कार्यविधि पनि नगरपालिकाले तयार पारेको छ ।
बैठकले आगामी चैत्र ३० गते व्यास नगरपालिकाको स्थापना दिवस मनाउन नगर प्रमुख वैकुण्ठ न्यौपानेको अध्यक्षतामा मुल समारोह समिति गठन गर्ने निर्णय पनि गरेको छ ।
दिवसका लागि वडा अध्यक्ष काजिमान श्रेष्ठको अध्यक्षतामा – स्मारीका प्रकाशन समिति, वडा अध्यक्ष काशिराम श्रेष्ठको अध्यक्षतामा – पुरस्कार छनौट सिफारिस समिति गठन गर्ने निर्णय पनि गरिएको नगरपालिकाको विज्ञप्तिमा छ ।
बैठकले जथाभावी कुखुरा, अण्डा ओसार पोसार कार्यले वर्ड फ्लु आउन सक्ने हुदाँ त्यस्को निगरानी राख्न र समस्या देखिएमा तत्काल सूचना दिन सम्बन्धीत सबैमा अनुरोध गर्ने निर्णय पनि गरेको नगरपालिकाद्वारा जारी विज्ञप्तिमा छ ।
