दमौली: नेपाली कांग्रेस व्यास नगर सभापतिमा सूर्यचन्द्र हड्खले निर्वाचित भएका छन् ।
पार्टीको व्यास नगर अधिवेशन अन्तर्गत शनिबार भएको मतदानमा सभापतिमा विजयी हड्खलेले सभापति पदका प्रत्यासी डम्बरबहादुर अधिकारीलाई पराजित गरेका हुन् ।
कुल ४ सय ४३ मतदाता मध्ये ४ सय ३२ ले मतदान गरेको निर्वाचनमा सभापतिमा विजयी हड्खलेले दुई सय ८२ मत पाए ।
प्रत्यासी अधिकारीले एक सय ४१ मत पाएका छन् ।
अधिवेशनबाट उप सभापतिमा सुर्जकुमार मल्ल र शोभा अधिकारी विजयी भए । मल्लले २९४ र अधिकारीले ३३० मत पाए ।
सचिवमा सुरेश पूरी र खेमराज पोख्रेल निर्वाचित भए ।
सचिव पुरीले २८९ र पोख्रेलले २८१ मत पाए । दुई मत बदर भएको थियो ।
मतदानमा उप सभापतिका प्रत्यासी सुजन वाग्लेले ९० तथा सुरेन्द्र पौडेलले ८८ मत पाएका थिए । मतदानमा सचिवका प्रत्यासी सरोज भण्डारीले दुई सय एक मत पाएका थिए भने सुनिल रिजालले ४३ मत पाएका थिए ।
