उम्मेदवारी घोषणा गर्दै देवकुमारले भने,‘नेता होईन मतदाताको मतले जित्छु’

दमौलीः व्यास नगर सभापतिमा चर्चामा रहेका नेपाल उद्योग वाणिज्य महासंघका केन्द्रीय सदस्य देवकुमार श्रेष्ठले नेपाली कांग्रेसको आसन्न १४ औं अधिवेशनमा महाधिवेशन प्रतिनिधि पदमा लड्ने घोषणा गरेका छन् ।

नेपाल पत्रकार महासंघ तनहुँको सभाकक्षमा पत्रकार सम्मेलन गर्दै उनले आफूले चुनाव जित्ने विश्वास व्यक्त गरे । तनहुँ क्षेत्र नम्बर १ बाट खुलातर्फको महाधिवेशन प्रतिनिधि चुनाव लड्ने घोषणा उनले गरे ।

यस अघि नगर सभापतिमा उनको नाम चर्चामा थियो । तर अकस्मात पत्रकार सम्मेलनमार्फत श्रेष्ठले महाधिवेशन प्रतिनिधिमा चुनाव लड्ने घोषणा गरेका हुन् । कुन समूहबाट चुनाव लड्नुहुन्छ भन्ने पत्रकारको प्रश्नमा उनले भने,‘म कांग्रेसमा समूह हुनुहुन्न भन्ने पक्षमा छु । म कोही नेता नभै कार्यकर्ताको मतले चुनाव जित्छु ।’

नगरमा युवा र नयाँलाई अवसर
श्रेष्ठले व्यास नगर समितिको उप सभापति र सचिव पदमा आफ्नै वडाबाट चुनाव लड्ने घोषणा गरेका र एकै वडाबाट सबै पद दावी गर्न नहुने भएकाले पनि युवालाई सघाउने बताए । ‘नगर समिति समावेशी हुनुपर्छ र एउटै वडाले मात्र दावी गर्नुहुन्न,’ उनले भने ।

‘नगरमा मात्र सीमित हुन्न’
उनले कार्यकर्ताको भावनाअनुसार पनि आफूले नगर सभापति भन्दा महाधिवेशन प्रतिनिधिमा चुनाव लड्न लागेको बताए ।

श्रेष्ठले नगरमा मात्र सीमित हुन भन्दा ठूलो ठाउँमा जान कार्यकर्ताले सुझाव दिएकाले भावनाको कदर गरेको बताए । उनले आफ्नो अनुभव र क्षमताका आधारमा पनि चुनाव जित्ने बताए ।