दमौली: काेभिड संकटका क्रममा खटिएका व्यक्तिहरूका लागि भन्दै तनहुँ समाज जापानले एक लाख ६ हजार रुपैयाँ सहयोग गरेको छ ।
समाजले तनहुँ उद्योग वाणिज्य संघले स्थापना गरेको कोभिड संकट महा अभियानलाई सहयोग गरेको हो । शनिबार आयोजित कार्यक्रममा कांग्रेस वरिष्ठ नेता रामचन्द्र पौडेलले रकम संघका अध्यक्ष पविन्द्रकुमार श्रेष्ठलाई हस्तान्तरण गरे ।
उनले जापान बसेर पनि जिल्लाका लागि सघाएको भन्दै समाजका संरक्षक राजेन्द्र जमरकट्टेल र समाजका सदस्यलाई आभार प्रकट गरे ।
समाजका संरक्षक राजेन्द्र जमरकट्टेलले विदेशमा भए पनि स्वदेशमा परेको संकटका क्रममा जापानमा रहेका तनहुङेमार्फत रकम संकलन गरिएको जानकारी दिए ।
नेपाल उद्योग वाणिज्य महासंघका केन्द्रीय सदस्य देवकुमार श्रेष्ठ र संघका जिल्ला अध्यक्ष पविन्द्रकुमार श्रेष्ठले सहयोगका लागि आभार प्रकट गरे ।
