दमौलीः शनिबारको जनसांस्कृतिक महासंघ र जनयुद्ध दिवस कार्यक्रममा विवादको टुंगोसँगै अबका दिनमा नेकपाका दुवै खेमाबीच कार्यक्रम गर्दाका लागि एउटा नियम बनाइएको छ ।
तनहुँ प्रशासनले तयार पारेको नियमका अनुसार अब नेकपाका दुवै पक्षमध्ये प्रशासन कार्यालयमा पहिले पुग्नेले हल पाउने भएको छ ।
शनिबारको कार्यक्रममा जनयुद्ध दिवस मनाउन तयारी गरेको प्रचण्ड नेपाल र जनसांस्कृतिक महासंघको कार्यक्रम तय गरेको ओली पक्ष दुवैले आफू नै पहिले पुगेको दाबी गरे पछि प्रशासनले मध्यमार्गी विकल्प निकालेको हो ।
प्रमुख जिल्ला अधिकारी सागर आचार्यका अनुसार विवाद चर्कन नदिन यस्तो सहमति गरिएको हो । आचार्यका अनुसार दुवै पक्षले पहिले आयोजनाको तयारी गरेको दाबी गरे पछि प्रशासनलाई जानकारी गराउने सहमति भएको हो ।
सहमति पत्रमा प्रचण्ड नेपाल खेमाका केन्द्रीय सदस्य प्रतपलाल श्रेष्ठ, गण्डकी कमिटि सदस्य शंकरनारायण श्रेष्ठ, जिल्ला सचिव राजेन्द्रकेशरी न्यौपाने तथा नगर अध्यक्ष श्रीराम कार्कीको हस्ताक्षर छ ।
यसै गरी, ओली खेमानिकट राष्ट्रिय सभा सदस्य भगवती न्यौपाने तथा नेताहरु श्रीप्रसाद श्रेष्ठ, प्रदीपराज अधिकारी र राजेश्वर ढकालले पनि यसमा हस्ताक्षर गरेका छन् ।