दमौलीः नेपाली कांग्रेसका वरिष्ठ नेता रामचन्द्र पौडेलले २०४७ सालदेखि मानुङको विकासका लागि थालेको अभियानले सार्थकता पाएको बताएका छन् ।
मंगलबार बिहान पर्यटकीय मानुङ डाँडा पुगेका पौडेलले अहिले प्रशस्त संख्यामा पर्यटक आएको देख्दा खुशी लागेको बताए । ‘यो डाँडाको दिन आउँछ भनेर मैले भनेको थिएँ,’ उनले भने ।
पौडेलले मानुङमा बाटो र खानेपानीका लागि पहल गरेको भन्दै अझ थप पूर्वाधार बनाउन सकिए मानुङ अझ अघि बढ्ने बताए ।
पौडेलले मानुङ जाने बाटोमा पहिले देखि नै करोडौं बजेट परेको भन्दै अहिले कालोपत्रे भएर योजनाले गति पाएको बताए ।
जिल्ला समन्वय समिति तनहुँका प्रमुख शान्तिरमण वाग्लेले मानुङको प्रचारका लागि पहिलो तनहुँ महोत्सवदेखि थालनी गरिएको बताए ।
व्यास नगर प्रमुख बैकुण्ठ न्यौपानेले मानुङको विकासका लागि व्यास नगरपालिकाले प्राथमिकता दिएको बताए । उनले पर्यटकीय विकास र पूर्वाधारका लागि नगरपालिकाले बजेट विनियोजन गरेको पनि जानकारी दिए ।
त्यसक्रममा मानुङका स्थानीयसँग अन्र्तक्रिया पनि गरिएको थियो ।