दमौलीः मानिस बिरामी परे पनि एम्बुलेन्सको अभावमा उपचारका लागि भएको कठिनाई कम गर्न भन्दै केशवटारमा एम्बुलेन्स खरिदको प्रक्रिया थालिएको छ । स्थानीय केशवटार माविले एम्बुलेन्स खरिदका लागि सहयोग जुटाउन महायज्ञ समेत लगाएको थियो ।
अब व्यास १४ वडा कार्यालयमार्फत खरिदका लागि तयारी अन्तिम चरणमा पुगेको वडाध्यक्ष काजिमान श्रेष्ठले बताए । उनका अनुसार खरिद गरिएको एम्बुलेन्स केशवटार स्वास्थ्य चौकीको मातहत राखेर चलाइनेछ ।
‘वरपरका मानिस बिरामी परेका बेला दमौली र अन्तबाट एम्बुलेन्स ल्याउनुपर्ने अवस्था थियो,’ उनले भने,‘अब वडाकै मातहतमा एम्बुलेन्स भएमा सजिलो हुने आशा छ ।’
व्यास नगरपालिकामार्फत कर छुटमा एम्बुलेन्स खरिद गरेर ल्याउने कार्य अन्तिम चरणमा पुगेकाले केही समयभित्रै केशवटारले एम्बुलेन्स पाउने अध्यक्ष श्रेष्ठले जानकारी दिए ।
