काठमाडौं- नेपाली कांग्रेसमा देखिएको विवाद थामिने सम्भावना कमजोर बन्दै गएको छ। विशेष महाधिवेशनबाट सभापति बनेका गगनकुमार थापालाई स्वीकार्न तत्कालीन सभापति शेरबहादुर देउवा र उपसभापति पूर्णबहादुर खड्कालाई गाह्रो परेको हो ।
थापाले मिल्नका लागि संवाद नगरेको भन्दै रिसाएको खड्का समूहले काठमाडौंको अनामनगरमा सम्पर्क कार्यालय नै खोलेको छ ।
कांग्रेसका निवर्तमान सभापति शेरबहादुर देउवा समूहले उक्त सम्पर्क कार्यालय खोलेको हो । देउवा अहिले पनि हङकङमा भूमिगतजस्तै छन् । यता खड्काको नेतृत्वमा कार्यालय खुलेको हो ।
सभापति थापाले देउवा र डा. शेखर कोइराला पक्षका १९ जना नेतालाई केन्द्रीय कार्यसमितिमा मनोनीत गर्दा पनि विवाद मिल्ने छाँट नदेखिएको हो । थापाले कोषाध्यक्षमा पनि देउवा समूहकै उमेश श्रेष्ठलाई दोहोर्याएका थिए । यति गर्दा पनि देउवा समूह अलग गतिविधिसहित सम्पर्क कार्यालय खोलेर नयाँ राजनीतिक अभ्यासतिर लागेको हो ।
अनामनगरमा नेताहरू गुरु बराल, जीतजङ्ग बस्नेत, जीत शेरचन, कुन्दन काफ्ले र कोशीका पूर्वमुख्यमन्त्री केदार कार्कीलगायतको पहलमा सम्पर्क कार्यालय खोलिएको हो ।
बराल, बस्नेत र काफ्ले कांग्रेसका निवर्तमान केन्द्रीय सदस्य हुन् । त्यस्तै शेरचन बागलुङ जिल्ला कार्यसमिति सभापति तथा गण्डकी प्रदेश सरकारका अर्थमन्त्री पनि हुन् । कार्की कोशी प्रदेश सरकारका पूर्वमुख्यमन्त्री हुन् । उनी एमालेको सहयोग लिएर मुख्यमन्त्री हुन सफल भएका थिए।
यस समूहले पार्टीको १५औँ महाधिवेशनलाई एकता महाधिवेशन बनाउने तयारीका लागि सम्पर्क कार्यालय खोलेको जनाएको छ ।
उता सभापति थापाले कांग्रेसका निर्वातमान उपसभापति खड्कासँग कम्तीमा तीन चरण वार्ता गरे पनि दुई समूहबीच कुरा मिल्न सकेको छैन । देउवा-शेखर पक्षले ६०/४० को हिसाबमा मिलेर जानुपर्ने अडान राखिरहेको छ।
