दमौली: एक पछि अर्को गर्दै दुई जना पुलबाट खसे पछि बल्ल व्यास १ र २ को सीमानामा पर्ने पृथ्वी राजमार्गस्थित बुल्दी पुलको मर्मत शुरु भएको छ । आर्थिक वर्ष २०७२।०७३ मा ठेक्का लागेको पुल बिहिबारबाट मर्मत हुन थालेको हो ।
लामो समय भए पनि मर्मत नगरिंदा उदयपुर कटारी नगरपालिका ९ निवासी ३७ वर्षका प्रेम रोका पृथ्वी राजमार्गस्थित पुलको रेलिङ भाँचिएको ठाउँबाट खसेका थिए ।
त्यसलगत्तै पुलको मर्मत थालिएको हो । यस अघि नै मर्मतका लागि रातो रिबन बाँधेर राखिए पनि पुल मर्मत नहुँदै दुई जना युवक खसेर मृत्युको मुखबाट जोगिएका थिए ।
सडक डिभिजन कार्यालय दमौलीका प्रमुख इञ्जिनियर अमितकुमार श्रेष्ठले पुल मर्मतका लागि पहिल्यैदेखि ठेकेदार कम्पनीलाई ताकेता गरिरहेको भए पनि बिहिबारबाट काम शुरु भएको जानकारी दिए । ‘उहाँहरुले थाल्दैछौं भन्नुभएको थियो,’उनले भने,‘आज दिउँसोबाट काम शुरु भएको छ ।’अहिले कम्पनीका कामदारहरुले पुलको रंगरोगन र रेलिङ भाँचिएको ठाउँमा वेल्डिङ थालेका छन् ।
