दमौलीः जिल्ला प्रशासन कार्यालय तनहुँले राती १० बजेसम्म मात्र देउसीभैलो खेल्न जिल्लावासीसँग अनुरोध गरेको छ ।
तिहारका अवसरमा एक सूचना जारी गर्दै प्रशासनले जिल्लाको समग्र शान्ति सुरक्षाको अवस्था मध्यनजर गर्दै देउसी, भैलो तथा नाचगानजस्ता कार्य राती १० बजेभित्र मात्र शान्तिपूर्वक गर्न अनुरोध गरेको छ ।
कार्यक्रमले सार्वजनिक यातायात र जीवनलाई असर नपर्ने गरी गर्न समेत प्रशासनले अनुरोध गरेको छ ।
सहायक प्रमुख जिल्ला अधिकारी जितबहादुर भण्डारीद्वारा जारी विज्ञप्तिमा पटका, आतिसवाजीजस्ता विष्फोटकजन्य पदार्थसमेत प्रयोग नगर्न आग्रह गरिएको छ ।
सूचनामा मादक पदार्थको सेवन गरी होहल्ला तथा झैझगडा गरेर अशान्तिका क्रियाकलाप नगर्नसमेत अनुरोध गरिएको छ ।
निषेधित कार्य गरेमा कानून बमोजिम कारबाही हुने प्रशासनले सूचनामार्फत उल्लेख गरेको छ ।
