भीमादः आफ्ना बिरामी पिता भेट्न गएका भीमाद ६ का ७१ वर्षका वृद्धको कोरोना संक्रमणबाट चितवनमा मृत्यु भएको छ । उनी ९८ वर्षिय पितालाई भेट्न चितवन मेडिकल कलेज गएका थिए । त्यसक्रममा आफ्ना पिता र भाईलाई कोरोना संक्रमण भेटिएपछि वृद्धमा पनि संक्रमण भेटिएको थियो ।
भाईकै घरमा होम आइसोलेसन बसेका उनलाई गाह्रो भए पछि उपचारका लागि अस्पताल लैजाँदा चिकित्सकले उनलाई मृत घोषणा गरिदिएका थिए । उनका पिता भने हाल राजधानीको मेडिसिटी अस्पतालमा उपचाररत छन् ।
ती वृद्धको चितवनको देवघाटमा नेपाली सेनाले सोमबार अन्त्येष्टि गरेको निकट आफन्तले जानकारी दिए ।
भीमाद नगरपालिकाका स्वास्थ्य प्रमुख मनराज बरालले आधिकारिक जानकारी आई नपुगे पनि कोरोना संक्रमणबाट मृत्यु भएको परिवारले जानकारी दिएको बताए । ‘परिवारका सदस्यले संक्रमणबाट ज्यान गएको भने पछि हामीले उहाँलाई चितवन जाँदा प्रयोग गरेको सवारीका चालकबारे खोजी गरेका छौं,’ उनले भने ।