विकास खनाल
दमौलीः गत सोमबार राती ट्रकको ठक्करबाट मृत्यु भएका मोटरसाइकलमा सवार दुई जनाको परिवारलाई साढे ६ लाख रुपैयाँका दरले क्षतिपूर्ति दिने सहमति पछि मृतकका आफन्तले शव बुझेका छन् ।
उचित क्षतिपूर्ति र दोषीलाइ कार्वाहीको माग गर्दै मृतकका आफन्तजनले दुई दिन देखि जिल्ला प्रहरी कार्यालयमा धर्ना दिएकामा बुधबार पीडित पक्ष र ट्रक व्यवसायी समितिबीच सहमति भएपछि शव बुझेको मृतकका दाजु ध्रुव विकले बताए ।
परिवारलाई तेश्रो पक्षको बीमामार्फत पाँच लाखसँगै ट्रक समितिको तर्फबाट डेढ लाख रुपैयाँका दरले क्षतिपूर्ति दिने सहमति भएको भनिए पनि प्रहरीले भने नियमअनुसार नै रकम सहमति भएको बतायो ।
तर प्रहरीले भने बिमा रकममा किरिया खर्च ५० हजार समितिले दिने गरी सहमति भएको दावी गरेको छ ।
काजक्रियावापत रु.५० हजार तत्कालै उपलब्ध गराइएको र अन्य रकम बिमामार्फत उपलब्ध हुने जिल्ला प्रहरी कार्यालय तनहुँका प्रवक्ता एवं प्रहरी नायव उपरीक्षक युवराज खड्काले बताए । ट्रकको ठक्करबाट सोमबार राती म्याग्दे १ का २६ वर्षिय विकास विक र व्यास ५ का २२ वर्षिय अनिल बाचे मगरको ज्यान गएको थियो ।
जन्म दिन मनाउन दमौलीबाट बन्दीपुर जाने क्रममा व्यास १२ देउरालीमा लु १ ख ९८३२ नम्बरको ट्रकले ग १८ प ९२२५ नम्बरको मोटरसाइकललाई ठक्कर दिंदा उनीहरुको घट्नास्थलमै ज्यान गएको थियो । अहिले ट्रक र चालक प्रहरी नियन्त्रणमा लिई अनुसन्धान भैरहेको जिल्ला प्रहरी कार्यलय तनहुँले बताएको छ ।
