दमौलीः नेपाली कांग्रेस तनहुँका निर्वाचित सभापति जीतप्रकाश आले संस्थापनइतर समूहको भेलामा सहभागी भएका छन् ।
राजधानीको गौशालास्थित अनुपम ब्यांक्वेटमा जारी समूहको भेलामा आले उपस्थित भएका हुन् ।
संस्थापन खेमाबाट निर्वाचित भए पनि आले व्यक्तिगत रुपमा पार्टी वरिष्ठ नेता रामचन्द्र पौडेलनिकट मानिन्छन् ।
कांग्रेस महाधिवेशन प्रतिनिधि रेशम गुरुनले आले बैठकमा सहभागी भएको पुष्टि गरे ।
यस अघि उनलाई राजधानी आएका बेला पौडेलले बोहराटारस्थित आफ्नो निवासमा सम्मान पनि गरेका थिए ।
पौडेलनिकट भए पनि संस्थापनको साथमा चुनाव जितेका आलेले गुट फेरेका हुन् वा पौडेलप्रति सदासयता देखाएका हुन्, त्यो भने केही समयका घटनाक्रमले बताउनेछन् ।