दमौलीः नेपाली कांग्रेसका महासमिति सदस्य रामचन्द्र पोखरेलले केन्द्रीय सदस्य पदमा चुनाव लड्ने घोषणा गरेका छन् ।
गृहजिल्ला तनहुँमा पत्रकार भेटघाट गर्दै पोखरेलले कांग्रेसमा नीतिगत सुधारका लागि आफूले जिम्मेवारी महसुस गरेर केन्द्रीय समिति सदस्यमा उम्मेदवारी दिन लागेको बताए । संविधान सभासद समेत रहेका पोखरेल तनहुँमा कांग्रेसका कुशल संगठक प्रजातन्त्र सेनानी गोवद्र्धन शर्मा पोखरेलका पुत्र हुन् ।
पोखरेलले पुरानो पुस्ताले निकै लगाव र मेहनतसाथ निर्माण गरेका कांग्रेसमा पछिल्लो समय सिद्धान्त र विचारबाट विमुख हुने प्रवृत्ति रोक्नका लागि पनि आफूले भूमिका खेल्ने बताए ।
लोकप्रिय मतका साथ महासमिति सदस्य निर्वाचित पोखरेलले पार्टी संगठन निर्माण तथा संविधान निर्माणलगायतमा दिएको योगदानका आधारमा आफू विजयी हुने विश्वास व्यक्त गरे ।
