दमौलीः व्यास नगरपालिकाले फोहोरमैला व्यवस्थापनका लागि निजी क्षेत्रबाट प्रस्ताव माग गरेको छ ।
फोहोरमैलाबाट उर्जा उत्पादन तथा मल निर्माणसमेतका लागि विभिन्न क्षेत्रबाट प्रस्ताव आएको भन्दै नगरपालिकाले इच्छुक कम्पनी वा संस्थाहरुसंग लागत साझेदारीका आधारमा नियमानुसार प्रस्ताव माग गर्ने निर्णय गरेको छ ।
नगरप्रमुख वैकुण्ठ न्यौपानेको अध्यक्षतामा सम्पन्न बैठकले यस्तो निर्णय गरेको हो । यस अघि पनि विभिन्न क्षेत्रबाट फोहोरमैला व्यवस्थापनसम्बन्धी प्रस्ताव आएको थियो ।
बैठकले स्नातक उतीर्ण बेरोजगार महिलाहरुको अनुदान वितरण सम्बन्धी मापदण्ड पारित गर्ने निर्णय गरेको छ ।
बालविकासका शिक्षकलाई साउनदेखि नै तलब
कार्यपालिका बैठकले व्यास नगरपालिका अन्तरगत कार्यरत बालबिकास शिक्षक, माविका लेखापाल र विद्यालयका कार्यालय सहयोगीलाई क्रमशः पन्ध्र हजार एक सय, पन्ध्र हजार पाच सय र चौध हजार पाँच सय रुपैयाँ श्रावण देखि नै पारिश्रमिक उपलब्ध गराउने निर्णय पनि गरेको छ ।
