चुँदीः चुँदीका युवाले आदिकवि भानुभक्तको जन्मथलोको सरसफाई तथा सालिक क्षेत्रको मर्मत गरेका छन् ।
आदिकविकै नामबाट प्रसिद्ध भए पनि सरसफाई र संरक्षण अभावमा भानुको जन्मथलो सिखरकटेरी नजिकै उनको अर्धकदको सालिक भएको क्षेत्रमा फोहोर भएको तथा पर्खाल समेत भत्किएको पाए पछि संरक्षण थालेका हुन् ।
चुँदी रम्घा बनाऔं अभियानको पहलमा युवाले सालिक क्षेत्रको झार उखाल्ने, घाँस काट्ने तथा सालिक र पर्खाल मर्मतको काम गरेको अभियन्ता सन्देश आचार्यले जानकारी दिए ।
पछिल्लो समय चुँदी रम्घा क्षेत्रको विकास निर्माणमा युवाले चासो र सक्रियता देखाएका छन् ।
सामाजिक सञ्जाल फेसबुकमा चुँदी रम्घा बनाऔं अभियान बनाएर आफ्नो क्षेत्रको विकास निर्माणबारे छलफल, बहस गर्दै स्थलगत रुपमा काम समेत थालिएको अभियन्ता आचार्यले दमौली न्यूजलाई बताए ।
