बन्दीपुर: गण्डकी प्रदेश सरकारले प्रेसमा अंकुश लगाउने गरी आलोचित भएको सञ्चार विधेयक परिमार्जन हुने बताएको छ ।
सरकारका एक उच्च अधिकारीले यस अघि नै सरकारले प्रक्रियामा लागेकाले छलफल गराएर परिमार्जन गर्ने उद्देश्यले नै अहिले विधेयक पेस भएको बताए ।
तनहुँको बन्दीपुर ढाबमा आयोजित एक सञ्चार प्रशिक्षण कार्यक्रममा बोल्दै प्रदेशको नीति तथा योजना आयोगका उपाध्यक्ष डा रघुराज काफ्लेले लोकतन्त्रका लागि लडेका मुख्यमन्त्रीले यसलाई संकुचित गर्ने गरी विधेयक पारित नगर्ने बताए ।
‘ मुख्यमंत्री चाहेर पनि सञ्चार क्षेत्रलाई अंकुश लगाउन मिल्दैन, ‘ उनले भने,’ अघि आइसकेको विषय टुंग्याउनुपर्छ भन्ने उद्देश्य हो । यसलाई परिमार्जन गर्ने पक्षमा उहाँ हुनुहुन्छ ।’ उनले प्रेसलाई अंकुश गर्ने कुनै उद्देश्य सरकारको नभएको बताए ।