दमौलीः दमौलीका युवाले एमसीसी खारेजीको माग गर्दै शव यात्रा निकालेका छन् । दमौली युथ ब्यानरमा निस्किएका युवाले अनशन चौतारामा एमसीसीको प्रतिकको शव यात्रा निकाल्दै ट्राफिक चोकमा कोण सभा गरे ।
सभाका सहभागीले ‘एमसीसी हामीलाई चाहिंदैन, देश बेच्न पाईंदैन’, ‘राष्ट्रघाती एमसीसी खारेज गर’, ‘एमसीसी मुर्दाबाद’ लगायतका नारा लगाएका थिए ।
आयोजकमध्येका एक सागर घिमिरेले राष्ट्रलाई घात हुने हिसाबले सम्झौता हुन लागेकाले बिरोध गरिएको बताए । अर्का सहभागी उज्वल भट्टराईले जनस्तरमा विरोध हुँदा पनि सम्झौता अघि बढ्न लागेकाले दबाब दिएको बताए ।
सहभागी मोहम्मद गफारले आगामी दिनमा पनि विभिन्न चरणका बिरोध कार्यक्रम गरिने भन्दै सम्झौता खारेज नहुँदासम्म चुप नलाग्ने बताए ।
स्वतःस्फूर्त सामाजिक सञ्जालका माध्यमबाट जोडिएका युवा कार्यक्रममा सहभागी बनेको आयोजकले जनाएको छ । यसअघि पनि दमौलीका युवाले विभिन्न किसिमका आन्दोलनमा दमौली युथको ब्यानरमा सहभागीता जनाउँदै आएका छन् ।