दमौलीः गृहमन्त्री बालकृष्ण खाँडले अकस्मात आएको सुख्खा पहिरोका कारण भानु ११ मानेचौकामा देखिएको जोखिमबारे चासो व्यक्त गर्दै नागरिक जोगाउन हरसम्भव प्रयत्न गर्न प्रशासनलाई निर्देशन दिएका छन् ।
तनहुँका प्रमुख जिल्ला अधिकारी सागर आचार्यलाई टेलिफोन गर्दै उनले बिस्थापितको चाँडो व्यवस्थापन गर्न भन्दै आवश्यक हरसम्भव उपाय अपनाउन निर्देशन दिए । ‘नागरिकको जीउधनको रक्षामा कुनै कसर बाँकी नराख्नुहोला,’ उनले भने ।
कुराकानीका क्रममा प्रमुख जिल्ला अधिकारी सागर आचार्यले घटना थाहा पाउनासाथ टोली खटाएर बिस्थापितलाई सारिसकिएको भन्दै सशस्त्र प्रहरीमार्फत टहराको व्यवस्था गर्ने जानकारी दिए । उनले स्थानीय तहसँग समन्वय गरेर सशस्त्र प्रहरीमार्फत उद्धारका काम सम्पन्न गरिने जानकारी दिए ।
अकस्मात सुख्खा पहिरो झर्न थालेपछि मानेचौकाको दलित बस्तीका सबै १२ घरपरिवार अहिले बिस्थापनामा परेका छन् ।