दमौलीः विद्यार्थीलाई अनलाईन कक्षा पढाउन भन्दै व्यास १४ केशवटारको केशवटार माविका १५ शिक्षकलाई ल्यापटप प्रदान गरिएको छ ।
राष्ट्रपति शैक्षिक सुधार कार्यक्रमअन्र्तगत हाल प्रदान गरिएको ल्यापटप अनलाईन शिक्षण तालिम सिकेका शिक्षकलाई प्रदान गरिएको छ ।
विद्यालयमा आयोजित एक कार्यक्रमकाबीच वडाध्यक्ष काजिमान श्रेष्ठले प्रधानाध्यापक दुर्गाबहादुर आलेको उपस्थितीमा शिक्षकलाई ल्यापटप हस्तान्तरण गरे ।
उनले ल्यापटप अभावमा अनलाईन शिक्षण नै हुन नसकेको अवस्थामा विद्यालयलाई प्रस्ताव बनाउन लगाएर कार्यक्रममा आवेदन दिएकामा सफल भएको बताए ।
‘२०६४ सालमा वायरलेस इन्टरनेट शुरु भएको विद्यालयमा अहिले अनलाईन कक्षा नै चल्न नसक्ने भए पछि गरिएको पहलले सार्थकता पाएको छ,’ उनले भने ।
अध्यक्ष श्रेष्ठले विद्यालयमा रहेका २२ मध्येका बाँकी शिक्षकलाई पनि तालिम पाए पछि ल्यापटप दिइने बताए । विद्यालयले सरकारबाट प्राप्त प्रति विद्यार्थी एक सय २५ रुपैयाँ रकमबाट इन्टरनेट खरिद पनि गरेर नियमित कक्षा सञ्चालन गर्ने प्रधानाध्यापक आलेले बताए ।
