दमौलीः तनहुँमा सक्रिय संक्रमितको संख्या पाँच सय कटेको छ ।
पछिल्लो २४ घण्टामा २३ जनामा कोरोना संक्रमण पुष्टि भएको छ । गण्डकी प्रदेश स्वास्थ्य निर्देशनालयका अनुसार यसरी संक्रमितमा १२ महिला र ११ पुरुष छन् । यससँगै सक्रिय संक्रमितको संख्या खतराको सूची नजिक पुगेको हो ।
सरकारको स्वास्थ्य मापदण्डमा पाँच सय बढी सक्रिय संक्रमित कट्नुलाई खतराको रुपमा लिने गरिएको छ । विगतमा यसै आधारमा लकडाउन समेत जारी गर्ने गरिएको थियो । तर पछिल्लो समय भ्याक्सिन लगाउने क्रम समेत बढेसँगै पहिलेकै ढाँचाको निषेधाज्ञा भने बिरलै जारी भएका छन् ।
तर पनि स्वास्थ्य अधिकारीहरुले सक्रिय संक्रमित पाँच सय नाघ्नुले स्वास्थ्य संस्थामा बिरामीको चाप थेग्न नसक्ने अवस्था भएमा खतरापूर्ण हुने चेतावनी दिने गरेका छन् ।