भरतपुर : राष्ट्रिय स्वतन्त्र पार्टी (रास्वपा) का सभापति रबि लामिछानेले निर्वाचनबाट प्राप्त शक्तिलाई दम्भ र प्रतिशोधको माध्यम बनाउने छुट कसैलाई नभएको बताएका छन्। शुक्रबार चितवनमा पार्टीको कार्यक्रममा विशेष सम्बोधन गर्दै सभापति लामिछानेले सरकारको नेतृत्व गरिरहेको पार्टीका नेता तथा कार्यकर्ताले सत्ता र शक्तिको उन्मादमा नभइ जिम्मेवारीबोधका साथ काम गर्नुपर्नेमा जोड दिए ।
पार्टीको नेता तथा कार्यकर्ताको व्यवहार, गतिविधि र कार्यशैलीलाई समाजले नजिकबाट नियालिरहेको भन्दै उनले आलोचना गर्ने अवसर दिन नहुने धारणा राखे । ‘समाजले देखाएको कमजोरी स्वीकार गरेर सुधारको बाटोमा अघि बढ्नु राजनीतिक परिपक्वता हो’ उनले थपे, “सत्तामा छौं, ठुला पार्टीको नेता कार्यकर्ता हौं भनेर ठालु पल्टिने छुट कसैलाई छैन, त्यो हाम्रो राजनीतिक चरित्र पनि होइन ।”
लामिछानेले विगतमा रास्वपामा आबद्ध भएकै कारण आफ्ना नेता तथा कार्यकर्ताले विभिन्न किसिमको राजनीतिक प्रताडना भोग्नुपरेको स्मरण गरे । ‘हिजोका सरकारबाट हामीमाथि अपमान भयो, प्रतिशोध साँधियो भन्दैमा आज प्रशासन र प्रहरीलाई राजनीतिक दबाब दिने काम हामीबाट पनि हुन्छ भनेर कसैले नसोचे हुन्छ, त्यस्ता गतिविधीले हामीलाई परसम्म लग्दै भन्ने कुरा हामीले राम्ररी बुझेका छौ ।’
सभापति लामिछाने भने, ‘ढुक्क हुनुस्, जनताले दिएको यो अभिमत जनताको हुर्मत लिनका लागि दुरुपयोग कोहि कसैबाट हुदैन ।’ साथै उनले पार्टी र सरकार बिचको सम्बन्धमा दरार सिर्जना गर्न बिभिन्न पक्ष लागिपरेकाले त्यस्तो हल्ला र अफवाहमा विश्वास नगर्न समेत नेता कार्यकर्तालाई आह्वान गरे । साभारः गोरखापत्र
