दमौलीः देशैभर कोरोना संक्रमण बढिरहेको अवस्थामा तनहुँमा पनि ग्राफ उकालो लागे पछि उत्पन्न अवस्थाबारे छलफल गर्न दमौलीमा अहिले जिल्ला कोभिड संकट व्यवस्थापन समिति (डिसीसीएमसी ) बैठक बस्दैछ ।
प्रमुख जिल्ला अधिकारी सागर आचार्यको संयोजकत्वमा जिल्ला प्रशासन कार्यालय तनहुँमा बस्ने बैठकमा संक्रमणको दर बढिरहेका बेला अपनाउन सकिने थप रोकथामका उपायबारे छलफल हुनेछ ।
पछिल्लो समय दैनिक संक्रमण दर बढिरहेको र पाँच सय पुग्न लागेका बेला संक्रमितको उपचार अनि फैलावट रोक्न अपनाउने उपाय, निषेधाज्ञाको ढाँचा आदि विषयमा समेत छलफल हुने सहायक प्रमुख जिल्ला अधिकारी चित्रांगत बरालले जानकारी दिए ।
बैठकमा आएका छलफल तथा सुझावका आधारमा थप कदम चाल्ने तयारी प्रशासनको छ । प्रशासनले सोमबारबाट लागु हुने गरी मात्र भौतिक उपस्थितीमा विद्यालयको कक्षा सञ्चालन गर्नमा रोक लगाएको थियो ।