मोरङः मोरङमा एक पुरुषले श्रीमतीको हत्या गरेर आफूले पनि आत्महत्या गरेका छन् । मंगलबार राति करिब १ बजे जिल्लाको बेलबारी नगरपालिका–१ मा ६० वर्षीय बमबहादुर लिम्बूले ४५ वर्षीया श्रीमती गीता लिम्बूको हत्या गरेर आफूले पनि आत्महत्या गरेका हुन् ।
जिल्ला प्रहरी कार्यालय मोरङका अनुसार लिम्बू दम्पती बेलबारी–१ भेडा टोलस्थित निर्मला राईको घरमा ४ वर्षदेखि डेरा बस्दै आएको खुलेको छ । उनीहरुको स्थायी ठेगाना यकिन भइसकेको छैन ।
उनले दाउले प्रहार गरेर श्रीमती गीताको हत्या गरेका थिए । दाउ प्रहारबाट टाउको, अनुहारलगायत शरीरका विभिन्न भागमा चोट लागेकी गीताको घटनास्थलमै मृत्यु भएको प्रहरीले जनाएको छ ।
श्रीमती को विभत्स हत्या गरेपछि बमबहादुरले पनि त्यही दाउले आफ्नो घाँटी रेटेर आत्महत्या गरेको प्रहरीको प्रारम्भिक अनुसन्धानबाट खुलेको छ । उनीहरूको ८ वर्षका छोरा भने भागेर बाँचेका छन् ।
बमबहादुर र गीता दुवैले दोस्रो बिहे गरेर बसेको प्रहरीको प्रारम्भिक अनुसन्धानबाट खुलेको छ । श्रीमान–श्रीमतीबीच के विषयमा विवाद भएर घटना भएको हो भन्ने यकिन हुन बाँकी रहेको प्रहरीले जनाएको छ । प्रहरीले घटनाको थप अनुसन्धान गरिरहेको छ ।
