ऋषिङः अविरल वर्षापछि ऋषिङ गाउँपालिकाको ऋंगपथ फेरि अवरुद्ध भएको छ । अजम्बरी तीर्थस्थल नजिकै ठूलो पहिरो खसेर सडक नै आधा भासिए पछि स्थानीय हिंड्न बाध्य भएका छन् ।
अझै पानी परिरहने र पहिरो झरिरहने भए आधा सडक पनि खस्ने देखिएको स्थानीय स्वास्थ्यकर्मी संकल्प श्रेष्ठले दमौली न्यूजलाई जानकारी दिए । हिलो भएका कारण हिंडडुलमा समेत कठिनाइ भएको भनाई स्थानीयको छ ।
गण्डकी प्रदेश सरकारको सहयोगमा सो सडक मर्मतको काम भैरहेको थियो । काम चलिरहेकै बेला आईतबार राती पहिरो आए पछि सोमबारबाट यातायात पूर्ण अवरुद्ध भएको स्थानीयको भनाई छ ।
पहिरो नरोकिंदासम्म सडकको मर्मत गर्न नसकिने निर्माण उपभोक्ता समितिले जनाएको छ ।
